870756 0 1

سادت حالة من الاستياء بين جمهور نادي الزمالك خلال الساعات الماضية، لاسيما مع ذكر اسم أمير مرتضى منصور، بعد الكشف عن رفع قيمة الغرامة المقررة على النادي لصالح لاعبه السابق، الغاني بنجامين أتشيمبونج، من 400 ألف لمليون و200 ألف دولار، حيث اعتبروا ذلك بمثابة دليل دامغ على تخبط القرارات الإدارية في النادي.

وعلق من جانبه الصحفي محمد الجارحي على تلك الواقعة بكتابته منشور مطول عبر حسابه على فيسبوك، حيث قال “لماذا أمير مرتضى منصور صاحب أغلى “تعسيلة” في مصر بـ١٢ مليون جنيه؟! — كل الناس تابعت غرامة اللاعب الغاني بنجامين أتشيمبونج لاعب الزمالك السابق اللي تعتبر قصة متكررة مع النادي بسبب القرارات العشوائية وتسريح اللعيبة وفسخ العقود ثم التقاضي والغرامات اللي بتكبد خزينة النادي أموال طائلة”.

.jpg

وتابع “الحكم الأول بخصوص أتشيمبونج كان ٤٠٠ الف دولار لكن فجأة بقى مليون و٢٠٠ الف دولار! عارف علشان إيه؟ علشان كابتن أمير مرتضى منصور محضرش جلسة الاستئناف اللي هي اونلاين بالفيديو كونفرانس وراحت عليه نومة!”.

وأكمل الجارحي بقوله “طب وهو أمير مرتضى ماله بالموضوع دا يا عم! دا الراجل كان مشرف على قطاع الكورة .. الموضوع باختصار إن نادي الزمالك كان موكل في القضية دي محامي برتغالي لكن فجأة كدا قالوا له شكرا لحد كدا بعد مرحلة التقاضي في الفيفا واحنا اللي هنكمل الجلسات في الاستئناف أمام محكمة التحكيم الرياضي كاس!”.

.jpg

وأضاف “ثم أصبح الممثل القانوني لنادي الزمالك في القضية هو الاستاذ أمير مرتضى منصور! باعتبار إن أمير مرتضى محامي بقى وكدا وأبوه بيحط اسمه في الدعاوى اللي بيرفعها قدام مجلس الدولة”.

وواصل بقوله “إيه اللي حصل بقى ؟؟ بقت المراسلات بين المحكمة وأمير مرتضى باعتباره ممثل النادي، والمحكمة أخطرته بموعد وتاريخ الجلسة للاستماع لأقواله وتقديم المستندات اللي بالمناسبة سهلة جدا واللاعب ماضي انه استلم مستحقاته ومتصور صوت وصورة لكن بعد كدا أنكر قدام المحكمة وقال دا حصل بالإكراه! – المفاجأة بقى إن الأستاذ أمير مرتضى منصور يوم الجلسة كسل يصحى الصبح بدري ووراحت عليه نومة وراحت عليه الجلسة اللي كان معادها الساعة ٩ صباحاً ومفيش حد تاني ينفع يحضر ولا حتى تم تقديم اعتذار ولا أي حاجة!”.

وأكمل “كانت النتيجة هي صدور حكم المحكمة بمضاعفة العقوبة ٣ مرات لإن اللاعب كان طالب تعويض كبير ومستحقات اصلا كان خدها! ونتيجة عدم احترام المحكمة وعدم الحضور وعدم الاعتذار طلع الحكم واتبعت للأستاذ أمير على الايميل يوم ٨ ديسمبر!

Screenshot 111111

وأردف “كان ممكن الحكم لا ينشر لو أمير مرتضى منصور لما صحي من النوم وشاف الحكم رد ع الايميل وطلب دا، لكنه لا طلب دا ولا بلغ إدارة النادي ولا اعتذر على تسببه في تحميل خزينة النادي المبلغ دا كله نتيجة استهتاره! – تخيل المبلغ زاد ٨٠٠ الف دولار عن الحكم الأول !! يعني أكتر من ١٢ مليون جنيه.. ودي تعتبر أغلى تعسيلة في مصر!”.

وختم بقوله “وهنا تقدر تسأل نفسك كام سؤال!
– ١- هل أمير مرتضى عنده أي خبره في النوع دا من القضايا علشان يمثل النادي؟ الحقيقة لأ!
٢- هل أمير مرتضى له أي صفة في مجلس إدارة النادي وقتها؟؟ الحقيقة لأ؟
٣-هل أمير مرتضى يمثل الادارة القانونية للنادي.. الحقيقة لأ!
ختاماً.. امبارح تابعنا تصريحات رئيس نادي شباب المحمدية المغربي، بخصوص حميد احداد.. الراجل قال ما معناه إنهم لو محتاجين حاجة من الزمالك، كانوا لازم يستنوا أمير مرتضى منصور لما يصحى من النوم”!

كُتب بواسطة

Eltalta

التالتة | مدرج جماهير الكورة